Dr Goldberg
von Traudel Karst

Dr Goldberg, mei Heimat, lasset euch saga
Isch gwachsa ond gwachsa, mr ko net klaga
Zom a kleine Buckel mit a paar Häuser druff
Lief mr’s Offerbergle nuff
Zom Kapellele, mr glaubt es kaum.
Sogar mit a ma richtiga Baum.

Aber sonst blos Felder, Wiesa, henta en Wald
Ond der hot scho Böblenga ghört. Aber bald
Hen Daimlerleut dr Anfang gmacht
Ond hen sich ens Fäuschtle glacht
Weil se mit em Rädle ens Gschäft komma send,
Manche sen glaufa, manche grennt.

Em Nu hen 8000 Menscha do gwohnt.
Fürs Finanzamt hot sich des glohnt.
Dr Rubel rollt, schöne Geschäfte entstandet
Dr Berliner Platz isch als Volltreffer glandet.

On dann kam der große IBMer Haufa,
mir Schwoba hen ons könna d’Hoor raus raufa,
weil Schwäbisch gabs nemme, au net en dr Schual
meine Kender send gsessa uff am vornehmen Stuhl,
dia IBM Fraua hen eikauft,  das Beste von allem
„Mein Mann ist bei der IBM“ hört mr se schallen.

Kirche und dr schöne Wasserturm wurden gebaut
Von dem mr über dr ganze Goldberg schaut.

Au heut no hot der Stadtteil sein Charm
Mir wird’s oms Herz ganz warm,
Breuninger, Hofmeister, Tankstelle, was braucha mr no
Multi Kulti isch jetzt überall do.
Restaurants, Minigolf, Hotels. Sogar die S-Bahn
Bringt internationale Gäste heran.

Dr Berliner Platz hoißt bald „ Platz International“
Mr hot jetzt die Qual der Wahl
Beim netta Italiener, en richtiger Eisverwöhner
Oder beim Türke en leckerer Döner.

Oh Leut, i komm so richtig ens schwärma,
beim Wort „Goldberg“ ko mr sich erwärma
ond zom jetziga 60iger Feschte
wünsch ich weiterhin das Allerbeschte.